x

75% of people globally want unbiased news (Pew Research) but are concerned they're not getting that.

Get balanced coverage with Symby. See how stories are covered across diverse outlets and spot when one side covers a story the other skips.

PODCAST

NASA 逐工一幅天文圖 APOD Taigi

NASA 逐工一幅天文圖 APOD Taigi

「逐工一幅天文圖 APOD Taigi」Podcast 是 NASA Astronomy Picture of the Day 台語版的有聲頻道。逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者為你解說。 https://apod.tw/ Powered by Firstory Hosting

science astronomy

All Episodes

1:46

1087. 金星 ê 相位 ft. 阿錕 (20240108)

NASA 逐工一幅天文圖 APOD Taigi ·

2024/02/07

金星有相位 ê 變化。金星就親像月娘，會出現完整 ê 圓盤，薄薄 ê 月眉形，kah 這兩款之間 ê 形態。金星定定是日落了後，抑是日出進前，天頂上光 ê 天體。毋過，伊傷細粒矣，一般是愛用雙筒千里鏡抑是細台天文望遠鏡，才有法度看清楚伊這馬 ê 相位是佗一款。這場縮時攝影系列相片，是 2015 年開 6 個月 ê 時間，tī 法國 Charente-Maritime 省 ê Surgères 翕--ê。毋但有翕著金星相位 ê 變化，嘛有翕著伊視寸尺 ê 改變。金星若是出現 tī 離地球較遠 ê 太陽後壁彼爿，伊看起來就會較細粒，而且是月圓相。金星 kah 地球若是攏出現 tī 太陽仝這爿，伊看起來就會較大粒，毋過會是月眉相。這個月 ê 金星會 tī 天光進前出現，會是頂膨月 ê 相位。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

2:22

1086. 蛇夫座 Zeta：逃走 ê 恆星 ft. 阿錕 (20240104)

NASA 逐工一幅天文圖 APOD Taigi ·

2024/02/06

Tī 這張予人讚嘆 ê 紅外線相片內底，有一粒逃走 ê 恆星，蛇夫座 Zeta，伊就親像是 tī 宇宙海內底咧行 ê 船仝款，產生這个弓形 ê 星際震波。這張假色影像中心附近，有一粒藍色 ê 蛇夫座 Zeta，這是一粒比太陽較大 20 倍 ê 恆星，用一秒鐘 24 公里緊 ê 速度向倒爿飛過去。伊頭前有足強 ê 恆星風，kā 厚塗粉 ê 星際物質壓縮、加溫，才會造成這个弓形 ê 震波波前。是講是啥物驅動這粒恆星？蛇夫座 Zeta 本底可能是雙星系統 ê 成員之一，伊 ê 星伴質量較大，性命嘛較短。等這个星伴變做超新星爆炸，質量消去了後，蛇夫座 Zeta 就去予擲出去這个系統矣。蛇夫座 Zeta 離咱 460 光年遠，光度差不多是太陽 ê 6 萬 5000 倍強。伊若毋是去予塗粉包咧，光線去予閘去，伊應該是地球天頂上光 ê 恆星之一。這張影像若是照蛇夫座 Zeta 估算 ê 距離來看，大細應該有 1.5 度闊，差不多是 12 光年大。2020 年 1 月 ê 時陣，NASA kā Spitzer 太空望遠鏡轉做安全模式，結束伊 16 年來，成功探索宇宙 ê 任務。

en

2:08

1085. 雷神 Thor ê 頭盔 ft. 阿錕 (20240109)

NASA 逐工一幅天文圖 APOD Taigi ·

2024/02/05

雷神 Thor 毋若有專屬 ê 日子（拜四），嘛是天堂 ê 頭盔。咱一般攏 kā NGC 2359 叫做雷神 Thor ê 頭盔。伊是一个帽仔形 ê 宇宙雲，閣有兩支翼股。雷神 Thor ê 頭盔有 30 光年闊，tùi 北歐神來講嘛是有夠大 ê。實際上，這个宇宙崁蓋較成是一个星際氣泡，是去予氣泡中心一粒明亮、大質量恆星 ê 高速恆星風吹出來 ê。中心恆星是 Wolf-Rayet 星，伊是足燒 ê 巨恆星，是超新星前期足短 ê 演化階段。NGC 2359 離咱有 15000 光年遠，to̍h tī 大犬座 ê 方向。這張遮爾清楚 ê 影像是濫幾若款無仝 ê 觀測資料，有闊頻 kah 狹頻濾片 ê 資料。內底毋若有一般看著 ê 影像，嘛有星雲雲絲 ê 清楚結構。雷神 Thor ê 頭盔中心 ê 恆星，閣紲落來幾若千年了後，應該會爆炸，變做壯觀 ê 超新星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/

en

2:08

1084. 光學波段 kah X-光波段 ê 貓眼星雲 ft. 阿錕 (20240107)

NASA 逐工一幅天文圖 APOD Taigi ·

2024/02/04

Tùi 一寡人來講，這看--起來敢若是貓咪仔 ê 目睭。毋閣其他人可能會感覺這是一粒 tī 宇宙 ê 大型海螺殼。伊實際上是一粒咱熟似 ê 行星形星雲。伊足光 ê、咱嘛看會著足詳細 ê 細節。伊 kah 太陽是仝款 ê 恆星，伊行到性命上尾坎站 ê 時陣，會 tī 一个足短 ê 發光階段 kā 氣體擲--出去，才形成這款星雲。這个星雲中央 ê 恆星欲死亡 ê 時陣，會連紲 tī 外層產生一重一重 ê 球形外殼。是按怎產生這个美麗、複雜、對稱 ê 內部結構，到今猶無蓋了解。這張影像是 kā Hubble 太空望遠鏡 ê 光學影像 kah 踅地球 leh 行 ê Chandra 天文台翕 ê X-光影像用數位組合 ê 方式敆做伙 ê。這个美麗 ê 太空雕像，有超過一半光年 ê 長度。咱若是斟酌看這粒貓咪仔 ê 目睭，可能會看著咱太陽未來 ê 命運。伊會 tī 差不多 50 億年了後，變做 kah 這个行星形星雲仝款 ê 演化階段。 ——— 這是 NASA Astronomy Picture of the Day ê 台語文 podcast

en

2:08

1083. 紐西蘭天頂 ê 穩定極光紅弧 ft. 阿錕 (20240103)

NASA 逐工一幅天文圖 APOD Taigi ·

2024/02/03

這个踅 tī 極光邊仔無四常 ê 紅光是啥物？伊是穩定極光紅弧 SAR。SAR 弧是真罕得看著，是 1954 年才知影，開始研究--ê。這張闊幅相片是這個月初 tī 紐西蘭 Poolburn 發生一場足強 ê 地磁風暴 ê 時陣翕著--ê。有翕著完整 ê SAR 弧，kā 較捷看著 ê 青色 kah 紅色極光包 tī 內底。是講 SAR 弧是按怎會形成，到今猶是一个研究主題，毋過伊真有可能 kah 保護地球 ê 磁場有關係，磁場是地球內部熔去 ê 鐵流動產生--ê。這个磁場通常會 kā ùi 太陽風紮來 ê 紮電粒子引導到地球 ê 南北極。毋過，伊嘛會 tī 赤道附近箍一輾離子，等太陽活動較激烈 ê 時陣，就會當 ùi 磁層提著能量。這个離子環內底 ê 高能電子，會 kah 比地球電離層內底普通極光較懸 ê 酸素相挵，激發酸素發出紅光。這馬咧進行 ê 研究，有揣著證據講，SAR 弧會當轉變做茄仔色 kah 青色 ê STEVE 極光。STEVE ê 全名是「速度增加的強熱輻射」。 ——— 這是 NASA Astronomy Picture

en

2:08

1082. 光--ê、暗--ê、kah 厚塗粉--ê ft. 阿錕 (20240110)

NASA 逐工一幅天文圖 APOD Taigi ·

2024/02/02

這張彩色夜景 ê 闊度有 3 粒月娘遐爾闊，是一个 tī 北天厚天星 ê 星雲，銀河盤頂懸附近 ê 皇家星座，仙王座內底。相片中央是發紅光 ê 發射區 Sharpless 155 (Sh 155)，嘛叫做洞窟星雲。伊就佇 2400 光年遠 ê 大質量分子雲區邊仔附近。這个宇宙洞窟 ê 氣體壁有 10 光年闊，去予邊仔高溫少年恆星 ê 紫外光 kā 電離去。像正爿 ê vdB 155，是一个厚塗粉 ê 反射星雲，伊佮實密閘光 ê 雲，佇這張星際畫布頂懸是滿四界。天文研究已經知影其他恆星形成活動會產生戲劇性 ê 信號，包括咧發紅光 ê Herbig-Haro 168 (HH 168)。中央正爿下跤--ê，是 Herbig-Haro 天體，伊 ê 發射源是新形成 ê 恆星噴出來 ê 高能噴射流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

1:46

1081. NGC 1232：偉大設計 ê 捲螺仔星系 ft. 阿錕 (20240101)

NASA 逐工一幅天文圖 APOD Taigi ·

2024/02/01

星系會遮爾迷人，毋但是因為看會著 ê 部份，閣有看袂著 ê 部份。這个極大望遠鏡陣列 ê 其中一台翕 ê 大捲螺仔星系 NGC 1232 ê 細節，就是一个袂䆀 ê 例。看會著 ê 部份主要是幾若百萬粒光爍爍 ê 恆星 kah 烏暗塗粉，in 攏去予重力搝 tī 捲螺仔手骨內底，做伙踅星系中心行。咱會當 tī 捲螺仔手骨頂懸看著開放星團 kah 伊內底光爍爍 ê 藍色恆星，閣有 tī in 中央，由實密 ê 星際塗粉形成 ê 烏暗帶。另外閣有較看無，毋過猶量會著 ê 幾若十億粒較暗 ê 恆星 kah 大量 ê 星際氣體。遮爾懸 ê 質量，做伙控制星系中心 ê 動力。這馬 ê 主流理論暗示講，其實有閣較大量 ê 物質咱是看袂著，in ê 型態咱嘛猶毋知。目前 ê 假設是講，烏暗物質是四界攏是，一部份是用來解說外部星系可見物質 ê 運動。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

1:39

1080.IC 443：海䖳星雲 ft. 阿錕 (20231226)

NASA 逐工一幅天文圖 APOD Taigi ·

2024/01/31

是按怎有一隻海䖳 tī 恆星海內底咧泅水？正爿 ê 海䖳星雲，就浮 tī 一粒足光 ê 恆星，雙子座 Eta 附近。伊 kā 伊 ê 鬚，ùi 中央倒爿光光 ê 發射弧伸出來。實際上，這隻宇宙海䖳是氣泡形超新星殘骸 IC 443 ê 一部份。IC 443 咧漲大 ê 屑仔雲是 ùi 大質量恆星爆炸來--ê。這个爆炸發--出 ê 光，上早來到咱地球是 3 萬年前。IC 443 就 kah 伊 tī 天文海洋內底 ê 親情，毛蟹星雲仝款，這个超新星殘骸中央有一粒中子星，是恆星核心崩塌 ê 殘骸。海䖳星雲離咱差不多有 5000 光年遠。照這个距離來估算，這張相片應該有 140 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231226/ 影像：David Payne 音樂：P!SCO - 鼎鼎聲優：阿錕翻譯：An-Li Tsai

en

1:39

1079. 月眉形 ê 土衛二 Enceladus ft. 阿錕 (20231216)

NASA 逐工一幅天文圖 APOD Taigi ·

2024/01/30

這幅 ùi 烏影區看出去 ê Cassini 太空船影像，是面對土星彼半球 ê 內衛星土衛二 Enceladus。Cassini ê kha-mé-lah tī 2016 年 11 月翕著這張戲劇性 ê 景色。相片頂懸是北方，相機是向太陽 ê 方向翕--ê，離衛星較光 ê 月眉形彼爿有 13 萬公里遠。實際上，遙遠天體反射超過 90 葩照著伊 ê 日光，予伊 ê 表面 ê 反射率 kah 拄落 ê 雪差不多仝款。直徑才 500 公里 ê 土衛二 Enceladus，無想到是一粒活跳跳 ê 衛星。Ùi Cassini 太空船飛過 Enceladus ê 時陣提著 ê 資料 kah 影像，揣著南極 ê 歇陣噴泉，伊會噴出水煙 kah 冰粒。另外嘛有揣著海洋 ê 證據，液態水就藏 tī 衛星 ê 冰層地殼下底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

2:22

1078. 揭示計畫：宇宙模擬影片 ft. 阿錕 (20231231)

NASA 逐工一幅天文圖 APOD Taigi ·

2024/01/29

咱是按怎來到遮--ê？請你揤「放送」，坐予好勢，開始來看。這个宇宙演化 ê 電腦模擬，提供咱了解 tī 這个宇宙中，星系是按怎形成--ê？人類是 tī 宇宙 ê 佗一位？揭示計畫是一个 tī 2014 年用 2000 萬點鐘 ê CPU 時間，追蹤 3500 萬光年長 ê 立方體 tī 130 億年內演化 ê 電腦模擬計畫。這个模擬是咧追蹤物質是按怎做出無仝款 ê 星系。這个虛擬宇宙那演化，一寡物質嘛那咧漲大。無偌久，這个宇宙就因為重力作用，堅做雲絲、星系、kah 星系團。這支影片是利用虛擬相機踅咧看一部份 ê 宇宙。頭一个是咧看烏暗物質 ê 演化，紲落來 0:45 ê 時陣是水素氣體 tī 無仝溫度 ê 變化，閣來 1:30 ê 時陣是重元素，像日素 kah 炭素 ê 出現，落尾 2:07 ê 時陣閣轉來看烏暗物質。影格倒爿下跤標 ê 是 ùi 大霹靂開始算 ê 時間，正爿下底標 ê 是物質 ê 種類。0:50 ê 爆發事件是星系中心 ê 超大質量烏洞噴出來 ê 燒滾滾 ê 氣泡。揭示計畫 kah 真正 ê 宇宙無仝 ê 部份真趣味，包括講這个模擬

en

1:39

1077. 木星 kah 雙生仔座流星雨 ft. 阿錕 (20231228)

NASA 逐工一幅天文圖 APOD Taigi ·

2024/01/28

這粒光爍爍 ê 火流星 tī 一个足短 ê 時間內，tī 地球夜空中變甲比木星閣較光。這張意外翕著 ê 影像，是 12 月 14，差不多是雙生仔座流星雨上濟 ê 時陣，tī 加拿大冷吱吱 ê 暗暝，利用 kha-mé-lah 咧翕流星 ê 縮時攝影 ê 時陣翕著--ê。雙生仔座流星雨是編號 3200 ê Phaethon 小行星 ê 年度禮物，一直是 tī 12 月 ê 時陣送--來。這粒神祕小行星落 tī 軌道頂懸 ê 塗粉粒，用一秒鐘 22 公里緊 ê 速度迵過地球高層大氣 ê 時陣，就會蒸發，變做流星光巡。是講，雙生仔座流星雨會叫做這个名，是因為這寡流星 ê 輻射點 tī 雙生仔座內底。這个輻射點就 tī 相片倒爿下底。除了流星以外，12 月 ê 夜空閣有昴宿星團 kah 畢宿星團，正爿閣有足光 ê 木星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

2:08

1076. 德國 Bavaria 州天頂 ê 冰暈 ft. 阿錕 (20231220)

NASA 逐工一幅天文圖 APOD Taigi ·

2024/01/27

是啥物 tī 天頂創出這寡無四常 ê 光弧？是冰晶啦！這個月初，德國 Bavaria 州 Füssen 附近拄落雪 ê 時陣，有一个攝影師發現講，伊走入去冰霧內底矣。浮 tī 空中 ê 水欲堅做冰霧，溫度愛低、空氣溫度嘛愛零度以下。這團冰霧反射聖 Coleman 教堂後壁欲日落 ê 日光。這个結果是攝影師看過上壯麗 ê 景色之一。咱愛先知影，這張相片內底 ê 光點毋是背景星，是浮 tī 空中 ê 冰 kah 雪。閣來，咱會當看著相片內底有兩个足明顯 ê 冰暈，就是冰晶反射日光造成 ê 日箍：22 度 ê 日箍 kah 46 度 ê 日箍。咱嘛看會著幾若條光弧，ùi 頂懸到下底是：對日弧（嘛叫做映日弧）、環天頂點弧、Parry 弧、切線弧、kah 幻日弧（嘛叫做環水平弧）。落尾，kah 太陽相連 ê 雞胿形光弧是上罕得看著--ê。伊叫做太陽弧，是日光 ùi 浮 tī 空中水平方向 ê 六角形冰晶 ê 邊仔面反射來--ê。 ——— 這是 NASA Astronomy Picture of the Day ê 台語文 podcast

en

1:39

1075. NGC 1499：加州星雲 ft. 阿錕 (20231219)

NASA 逐工一幅天文圖 APOD Taigi ·

2024/01/26

太空中敢有 Calafia 女王 ê 神話島嶼？可能無，毋過這團太空分子雲 ê 外形，kah 美國加州是有成。咱 ê 太陽就 tī 銀河系 ê 獵戶座捲螺仔手骨頂懸，離加州星雲才 1000光年遠爾爾。伊嘛叫做 NGC 1499，是一个典型 ê 發射星雲，差不多有 100 光年長。Tī 這張影像內底，加州星雲上顯目 ê 紅光，是 ùi 水素原子重新 kah phàng 見 ê 電子複合，發出 ê 光。這个 phàng 見 ê 電子，是去予高能恆星光 kā 電離，才走去--ê。發出高能恆星光、kā 大部份星雲氣體電離 ê，應該是 tī 星雲 ê 正爿彼粒較光、高溫、藍色 ê 英仙座 ξ。加州星雲是天文攝影師愛翕 ê 目標。Tī 烏暗夜空中，用闊幅望遠鏡 tī 英仙座方向、昴宿星團附近就揣會著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

2:08

1074. 超新星殘骸仙后座 A ft. 阿錕 (20231214)

NASA 逐工一幅天文圖 APOD Taigi ·

2024/01/25

咱銀河系內底 ê 大質量恆星有燦爛 ê 一生。In 是 ùi 大型宇宙雲崩塌來--ê，in ê 核子反應爐著起來了後，會 tī 核心製造重元素。大部份大質量恆星經過短短幾若百萬年了後，會 kā 伊產生 ê 物質噴轉去星際空間，變做後一擺做恆星 ê 材料。這个咧漲大 ê 屑仔雲叫做仙后座 A，這是恆星性命週期上落尾 ê 階段。超新星爆炸產生超新星殘骸，伊發出來 ê 光，350 年前頭一擺 tī 地球天頂 hŏng 看著，毋過這个光其實是愛開 1 萬 1000 年才會到咱遮。這幅 James Webb 太空望遠鏡 ê NIRCam 翕 ê 清楚影像，有翕著超新星殘骸猶燒滾滾 ê 雲絲 kah 雲丸。咧漲大 ê 白煙外殼，大細差不多有 20 光年大。Uì 大質量恆星爆炸發出來 ê 光，有去予 Webb 太空望遠鏡翕著。這張清楚影像，就是超新星殘骸仙后座 A。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

1:39

1073. 深空視場：心臟星雲 ft. 阿錕 (20231213)

NASA 逐工一幅天文圖 APOD Taigi ·

2024/01/24

是啥物驅動心臟星雲發光？代先，倒爿 ê 大型發射星雲 ê 編號是 IC 1805，看起來敢若是人 ê 心臟。星雲發 ê 紅光，是 ùi 伊主要 ê 成分，水素，來--ê。毋過這張長時間感光影像，閣有濫 sir-lí-khóng（黃色）kah 酸素（藍色）發出 ê 光。心臟星雲中央是開放星團 Melotte 15，內底 ê 少年恆星，利用激發態 ê 原子高能光 kah 恆星風，tī 這區雕出幾若條足媠 ê 塗粉柱。心臟星雲就 tī 仙后座 ê 方向，差不多 7500 光年遠 ê 所在。心臟星雲正爿下底，閣有魚頭星雲 kah 伊做伴。這張闊幅深空影像清楚表示講，心臟星雲 ê 四箍圍仔攏是咧發光 ê 氣體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231213/ 影像：William Ostling, Telescope Live

en

2:08

1072. 獵戶座太空船 kah 風暴洋 ft. 阿錕 (20231207)

NASA 逐工一幅天文圖 APOD Taigi ·

2024/01/23

2022 年 12 月 5 號，無載人 ê 獵戶座太空船用回航動力飛過月球 ê 時陣，鬥 tī 伊頂懸 ê kha-mé-lah 翕著這个景色。Tī 獵戶座太空船其中一組拍開 ê 太陽能枋陣列後壁，是風暴洋西爿烏暗 koh 滑溜 ê 地形。Tī 月球這爿 ê 風暴洋是足顯目--ê，伊是月球頂懸去予熔岩崁牢 ê 月海內底上大--ê。月球 ê 晨昏線，就是月球暗暝 kah 日時 ê 交界線，就 tī 這張影像倒爿。直徑 41公里 ê Marius 隕石坑就 tī 中央頂懸，輻射形 ê Kepler 隕石坑就出現 tī 正爿上邊仔，太陽能枋陣列 ê 正爿遐。Kepler 隕石坑 ê 淺色 ê 輻射紋向北 kah 向西去，一直到烏暗 ê Marius 隕石坑遐。2022 年12月11日，獵戶座太空船轉來 in 兜矣。落尾這个歷史性 ê Artemis 1 號任務 ê 獵戶座太空船成功轉來地球，落 tiàm 地球表面 ê 太平洋，噴甲規四界，結束伊 ê 任務。 ——— 這是 NASA Astronomy Picture of the Day ê 台語文 podcast

en

1:39

1071. 船底座星雲內底 ê 恆星 kah 塗粉 ê 相戰 ft. 阿錕 (20231206)

NASA 逐工一幅天文圖 APOD Taigi ·

2024/01/22

這是船底座星雲內底 ê 恆星 kah 塗粉 ê 相戰，恆星贏矣！講較詳細咧，拄生出來 ê 大質量恆星 ê 高能光 kah 恆星風 kā 生 in ê 厚塗粉 ê 恆星托兒所蒸發、歕予散。這寡塗粉柱是 tī 船底座星雲內底，一个私底下叫做神祕山 ê 所在。In 主要是會透光 ê 水素氣體，毋過外觀是袂透光 ê 咖啡色塗粉。雖罔講有一寡塗粉柱看起來敢若火把，毋過 in 無著。而且，in 是去予附近 ê 恆星照予光。這張影像是 Hubble 太空望遠鏡翕--ê，是咧強調 7500光年遠 ê 船底座星雲內底一个 1 光年大，叫做 HH1066 ê 部份。閣幾若百萬年，這寡恆星就會贏矣！這寡塗粉火把就會完全蒸發去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231206/ 影像來源：NASA, ESA, Hubble Heritage

en

1:39

1070. 三粒星系 kah 一粒彗星 ft. 阿綠 (20231221)

NASA 逐工一幅天文圖 APOD Taigi ·

2024/01/21

這張向南天天鶴座方向翕 ê 1 度闊闊幅視野內底，四界攏是遙遠 ê 星系。毋過，正爿下跤有三个捲螺仔星系是足出眾--ê。實際上，這三个星系是一組--ê，叫做天鶴三重奏，離咱有 7000 萬光年遠。這張 12 月 13 翕 ê 望遠鏡影像，有翕著美麗彗星 C/2020 V2 ZTF。這粒彗星這馬 kah 咱 ê 距離差不多是 29 光分遠，伊綴雙曲線軌道欲離開內太陽系，迵過黃道面落去。這粒 ZTF 彗星 tī 2023 年 5 月上倚太陽，kah tī 9 月上倚地球 ê 時陣較光。毋過咧翕這張南天夜空 ê 望遠鏡相片 ê 時陣，伊猶是足光--ê，所以伊看起來 kah 天鶴三重奏就差不多光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231221/ 影像：Dan Bartlett 音樂：P!SCO - 鼎鼎聲優：阿綠翻譯：An-Li

en

1:39

1069. 仝色錯覺 ft. 阿錕 (20231218)

NASA 逐工一幅天文圖 APOD Taigi ·

2024/01/20

格仔 A kah 格仔 B 敢是仝色？確實是按呢！你若是 kā 你 ê 滑鼠徙一下抑是揤一下就看會著 in 是仝色。這張錯覺插圖，叫做仝色錯覺。科學上，人類若是完全倚靠視覺，可能會拄著看毋著抑是看袂清，就算是直接看相對色彩，嘛有可能認毋著。天頂嘛有足濟錯覺現象，像月娘 tī 地平線附近 ê 寸尺看起來較大，抑是天體 ê 外形看起來親像某一項物件。像 CCD 這款自動化、會當重複測量 ê 設備，會當予一般科學 kah 天文學較莫受著人類錯覺 ê 影響，雖然講無法度完全袂影響著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231218/ 影像：Edward H. Adelson, Wikipedia 音樂：P!SCO - 鼎鼎聲優：阿錕翻譯：An-Li Tsai (NSYSU)

en

1:39

1068. 中國念湖天頂 ê 雙生仔座流星雨 ft. 阿錕 (20231217)

NASA 逐工一幅天文圖 APOD Taigi ·

2024/01/19

這寡流星是 tùi 佗位來--ê？以天頂 ê 方位來看，這个答案應該是指向雙生仔座。這就是是按怎 12 月主要 ê 流星雨叫做雙生仔座流星雨，因為這寡流星雨攏是 ùi 一个 tī 雙生仔座 ê 輻射點來--ê。Ùi 3D 空間來看，這粒編號 3200 ê 奇怪小行星 Phaethon 噴出來--ê 沙塗大細 ê 屑仔，就落 tī 踅太陽 ê 軌道頂懸，其中較倚地球 ê 部份就出現 tī 雙生仔座頭前。地球行過這粒小行星 ê 軌道 ê 時陣，因為這寡落落來 ê 沙塗屑仔出現 tī 雙生仔座方向，所以輻射點看起來就 tī 雙生仔座內底。這張相片是 kā 幾若工前 tī 中國念湖暗暝翕--ê 足濟張相片鬥做伙 ê 組合影像。咱會當看著內底有超過 100 粒較光 ê 雙生仔座流星雨 ê 流星軌跡。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：

en

1,434 results

Similar Podcasts

Classic Radio Science Fiction

solgoodmedia.com

Mission to Mars

Inception Point Ai

The 365 Days of Astronomy

365DaysOfAstronomy.org

Creek Devil

william Jevning

UFO Chronicles Podcast

Nik Hunter