PODCAST

社群咧衝啥

使用台語談論社群時事，第一個遇到的問題就是「這個詞台語怎麼說？」，許多人自認的「台語很好」其實僅侷限於低限度的簡易日常生活用語；然而當代社會資訊爆炸，每天都有新事物出現、即使是兒童的生活用語，也已過去大不相同，台語需要在這樣的快速變動中，迅速趕上，除了專家學者訂定的新詞辭庫，更需要在網路上、生活中、媒體內容裡都被不斷被使用，才有機會補足「台語沒人這樣說」的刻板印象。《社群咧衝啥》給你網路爆紅話題、有趣的人事物或社群流行趨勢解析，「社群咧衝啥，台語綴時行！」 -- 前往＞＞央廣臺灣台語迷眾頁聽友來函：atlantis919@rti.org.tw 【揣著亞特】亞特陪你káng台語亞特陪你káng台語✪ 亞特節目

society & culture relationships

All Episodes

畫本咧衝啥？台語學藝術，「構圖」、「透視法」你敢講會出？

社群咧衝啥 ·

2025/11/20

紅色、藍色、青色你會曉講，毋過「薰衣草紫」、「青蘋果綠」、「天空藍」台語欲按怎講？畫圖的工夫像「構圖」、「透視法」又閣按怎用台語表達？市面上現此時出現一本主打「用台語學藝術」的繪本《哎呦喂啊！愛用畫的》，圖面是今上時行的「台灣感性」風格，也是在地日常風景，聽講繪本閣有種種機關，幫助囡仔看繪本學藝術閣練台語？這集邀請發起繪本計畫的「畸零地工作室」成員孟榆佮以臻，來開拆這本台語繪本機關何在。

zh_TW

海產咧衝啥？凊彩食入腹肚底，台灣的魚仔你捌幾尾？ ft.黃之晹╱海洋大學副教授

社群咧衝啥 ·

2025/11/13

這幾年時行講「台灣干焦海產文化，無海洋文化」，毋過你敢誠實了解「海產」？無論是掠的抑是養殖，咱常在是「食魚煞毋捌魚」，這集邀請海洋大學水產養殖系副教授、《好好吃魚》作者黃之晹來分享全台各地的海產特色，台灣定看的魚仔，你聽過幾款？閣食過幾款咧？這集聽了，揣機會行入市仔的魚擔，來熟似一下仔家己生活當中捷看著的魚仔啥款？

zh_TW

動畫咧衝啥？動畫開喙講台語，配音鋩角有玄機 ft.葉又菁╱配音員

社群咧衝啥 ·

2025/11/06

這幾年愈來愈濟出名動畫配做台語版，而且風評攏真好，《派對咖孔明》的台語版拄出來的時，甚至閣引起網路頂真大的討論，這集邀請著台華雙語配音員葉又菁來分享伊的台語配音經驗，猶有台語配音的現場指導又閣是咧創啥？你敢有看過佗一齣台語動畫？咱做伙來聽看覓，台語配音啥款鋩鋩角角？

zh_TW

AI咧衝啥？人工智慧滿滿是，按怎運用才合宜？ ft.莊哲昀AJ╱泛科學院頻道主理人

社群咧衝啥 ·

2025/10/30

AI(人工智慧)愈來愈進入一般人的生活，目今咱無論掰手機仔、翕相、穡頭，甚至安排國內、外旅行攏有AI的影跡，毋過你的AI是人工智慧，抑是工人智慧？這就看你按怎共伊「牽教」矣。這集邀請著AI的專家、泛科學院Youtube頻道主理人「AJ莊哲昀」來節目開講，用上簡單的比喻，快速建立咱對AI的理解，同時嘛提醒咱，AI生產的物件愈來愈濟，網路消息真真假假，咱該愛如何面對未來的AI世界，按怎敢伊和平相處？>>>泛科學院Youtube頻道

zh_TW

營隊咧衝啥？爸母的放冬救星，冬令營是咧搶啥貨？ ft.董力玄╱台灣台語路協會理事長

社群咧衝啥 ·

2025/10/23

接續頂一集講台語學校，這集來關心學校放冬的時，家長會使共囡仔㧒……我是講……「安排」去佗位，才會用得消耗囡仔的體力，閣有收穫，袂規工佇厝閒仙仙，時間攏拍損去，閣會使予囡仔放假期間過了會歡喜、爸母嘛通歇喘，「營隊」是目今上時行的選擇，毋過營隊主題百百款，對台語家庭來講，敢有彼款會使學物件、會使耍甲忝歪歪，閣會使用台語來參加的營隊咧？台灣台語路協會直接揣營隊專門戶來合作，理事長力玄所介紹的營隊，和亞特家己都想欲去參加！「啊～～足想欲轉去囡仔時～～」

zh_TW

台語學校咧衝啥？母語欲活了好，著對教育來起造 ft.董力玄╱台灣台語路協會理事長

社群咧衝啥 ·

2025/10/16

2025年9月1號起，高雄路竹的北嶺國小正式轉型做全台頭一間台語實驗小學，毋但引起真濟台語家庭的注目，也確實大大提升招生人數；同時也引起其他縣市台語家庭的討論，希望家己所在的縣市也會當設立台語小學。到底台語小學是咧學啥？敢是有較濟台語課？抑是用台語咧上課？台語敢有法度用來上各種課？學校又閣會拄著啥款困難或者質疑？這集邀請台灣台語路協會理事長，同時也是台語家庭母親的董力玄，𤆬咱做伙來了解台語學校，嘛了解台語家庭的需求佮困境。

zh_TW

神怪劇咧衝啥？戲說籠面扮神明，會做會唱帶天命 ft.黃新皓╱演員、歌手

社群咧衝啥 ·

2025/10/09

號稱「上緣投乩身」，閣是演員、閣是歌手的黃新皓(阿皓)來「告白」！佇出名本土劇《戲說台灣》演出田都元帥煞來衝紅的阿皓，毋但演神明，閣是自細佮神明有好交情！本底出道欲唱歌的阿皓，是按怎煞變成演員？而且一搬就是十偌年，毋但去到中國演出古裝的「籠面戲(偶像劇)」，轉來台灣嘛是戲路無停真無閒，踅一大輾煞又閣回到當初時上想欲做的歌手身份，這回推出專輯《新の告白》，聽講閣是佮神明先撨好勢的？阿皓講神明捌共伊指示：「成功著愛行遠路」，到底啥意思？做伙來聽神明的話按怎破解。

zh_TW

Podcast咧衝啥？鹿港阿愷聲悠悠，金鐘敢會提到手？

社群咧衝啥 ·

2025/10/02

鹿港阿愷來矣！這回以Podcast頻道《阿愷之聲》入圍廣播金鐘獎Podcast獎項，聽講煞變做「鹿港之光」，久無聯絡的親情、朋友攏來祝賀、在地媒體報導、政治人物嘛來介紹，入圍了後的阿愷，佇鹿港的生活有啥款改變咧？若誠實有機會上台領獎，敢有想好致詞欲講啥？來聽看覓阿愷按怎講。Facebook>>>阿愷之聲PodcastInstagram>>>阿愷之聲Podcast

zh_TW

台語漫才咧衝啥？激悾黜臭雙人好笑款，台頂盡看「妹迪 in Taiwan」ft.表妹、胡迪╱漫才演員

社群咧衝啥 ·

2025/09/25

你敢看過來日本式的答喙鼓－「漫才」表演，台灣各地現此時有愈來愈濟漫才團體出現，其中上影目的團體之一，就是舊年才成立、由「表妹」佮「胡迪」二人所組成的「妹迪 IN TAIWAN」，二人毋但台風在、「(劇)本」好笑，閣較是台灣少數用台語講漫才的團體，in 的演出影片佇囥起去Youtube頻道，就隨隨引起真濟關注，in 的名是按怎來的？又閣是按怎會行這條漫才之路？台語佇漫才內底的意義是啥？這集咱做伙來熟似二位未來佇漫才領域穩當大出擢的「明日之星」。

zh_TW

顯化咧衝啥？心想事成靠顯化，manifest敢有遮爾聖？

社群咧衝啥 ·

2025/09/18

你敢捌聽過予人心想事成的「顯化(manifest)」，顯化到底是啥？伊佮仝款真出名的「吸引力法則」敢有無仝？誠實只要照起工來，啥款願望攏會使實現？伊佮心理學敢有啥款關係？心理師按怎看待這个網路頂真時行的話題咧？這集邀請專業的諮商心理師阿寶，做伙來討論「顯化」到底是啥貨。【聯絡阿寶丨心理師乾杯】 >>>Facebook >>>Instagram

zh_TW

弄喙花咧衝啥？徛台笑詼來比武，百變和尚展功夫 ft.唐墨╱喜劇演員

社群咧衝啥 ·

2025/09/11

※本集節目為著討論徛台笑詼的禁忌，一部份內容可能會使人感覺冒犯，請聽友家己斟酌敢欲收聽落去。--日本出家的台灣人做徛台笑詼(Stand-up Comedy，站立喜劇)會是啥物款？身份濟濟的唐墨閣來矣！伊這遍是以「喜劇演員」的身份，來講參加笑詼比賽節目《Talk Talk 秀台語》的想法，猶閣有電視台袂用得放「危險話題」！唐墨講伊做喜劇是為欲佇當中宏掦佛法，毋過徛台笑詼定定咧著火燒呢？？講笑詼敢有啥禁忌？練喙花閣咧變啥物？聽這集予你又閣暢又閣驚！

zh_TW

美詞咧衝啥？仙氣媠聲有詩意，若喬陪你 O̍h Tâi-gí ft.溫若喬╱台語社群經營者

社群咧衝啥 ·

2025/09/04

佇網路上予人叫做社群平台threads的淨化口座，以帶仙氣媠聲的聲音檔佮美感十足的配圖、詩意滿滿的例句來教台語，經營者「溫若喬」本人就是一位感覺聽伊講話氣質十足的女性，臨床心理學背景的若喬，按怎共伊的心理知識，用佇台語社群口座的經營？佇社群走跳往往會拄著使人慼心的人，伊又閣按怎排解心情？紲落來這个號做「o̍h Tâi-gí」的社群口座，又閣拍算講出啥物款佮別人無仝的路？這一集，咱就欲佇淨化人心的仙氣媠聲當中，做伙來了解伊的台語社群經營之道。

zh_TW

字典咧衝啥？學習台文靠芋圓，緣投少年揣回母語舌 ft.芋圓╱APP開發工程師

社群咧衝啥 ·

2025/08/28

想欲學台文佮台語，你需要好家私，一上線就引起濟濟討論的台語字典APP－芋圓字典的開發者「芋圓」本人來矣！猶真少年的芋圓捌佇國外生活幾若年，嘛捌做過教外國人講華語的Podcast頻道，是按怎落尾會想欲來開發台語字典APP咧？聽講伊是沓沓仔共母語抾轉來，對「一句講就袂曉話」，到會當全台語演講，這个過程是按怎做會到？而且節目一開始，芋圓就雄雄喈(kainn)甲哼哼呻，到底亞特是講啥，予伊歹勢甲？！

zh_TW

西拉雅咧衝啥？祖靈公媽我是啥人？我的姓是Akatuang ft.段洪坤╱西拉雅族部落發展促進會理事長

社群咧衝啥 ·

2025/08/21

「(演講)時間不夠矣，我是原住民，應該會使『加分』啦乎？」這是西拉雅族人Alak Akatuang(段洪坤)佇一場演講內底所講的笑詼。毋過這个表面看來是咧剾洗原住民時常面對的考試加分話題變做笑詼，話仁內底煞是閣再反轉，直接對著原住民平埔族群爭取正名的相關議題。是啥物情形，會予家己的阿舅當面講出「你人不做，欲做番？！」一个西拉雅人成長過程當中的疑問，以及族群意識的覺醒會是啥物款？西拉雅族人爭取的正名又閣是啥？這集咱對雲南大理國段氏皇族(？)講起，一直到妖精按怎修煉成人(？)……話題走精？聽落去你就知。

zh_TW

刑案咧衝啥？Twitter面頂九人被害，酷刑分屍藏佇厝內 ft.唐墨╱作家

社群咧衝啥 ·

2025/08/14

來賓：唐墨╱作家2025年6月，日本執行一件死刑，犯人號做「白石隆浩(しらいし　たかひろ)，伊佇2017年8-10月期間，利用社群平台Twitter(現此時改名做『X』)，走揣有鋪文表示孤單、想欲自殺的查某囡仔，共遮的人誘拐到稅厝的公寓殺害，三個月內攏總刣死九人，這个驚動規个日本的「座間九人殺害事件」，到底是發生啥代誌？內底又閣牽涉著啥款社會文化佮死刑議題？這集邀請推理小說作家唐墨，做伙來開講這件驚天動地的刑事案件。

zh_TW

時行語咧衝啥？「蛋雕」、「泉」、「虫合」到底是啥物？社群用語講透機 ft.宜蘭╱廣播人

社群咧衝啥 ·

2025/08/07

來賓：宜蘭╱廣播人「蛋雕」、「泉」、「虫合」到底是咧講啥？網路時行語定定予人捎無摠？「已購買，小孩愛吃」、「急了」、「很躁」台語又閣會使按怎講？這集亞特邀請佇開播集誠受歡迎的宜蘭再度來做客，這回咱來講網路頂有人整理出來的「2024網路時行語」，遮的詞你敢攏看有？欲綴會著網路社群千變萬化，時行語咱著加知寡，做伙來熟似兼解破，才會知影目今囡仔咧講啥。

zh_TW

電子冊咧衝啥？冊無印佇紙簿，敢是未來的出路？ ft.鄭清鴻╱前衛出版社主編

社群咧衝啥 ·

2025/07/31

中國品牌的電子冊閱讀枋(讀冊機)出現資安顧慮，佇網路社群引起真濟討論，連帶嘛予「電子冊」的價值到底佇佗的討論愈絞愈鬧熱，真濟人認為電子冊無實體印刷的成本，照理應該賣比實體的紙冊較俗，毋過目前市面上電子冊的價數佮紙本冊其實精差無濟，「機關安佇倉庫，其中必有緣故，冊無印佇紙簿，敢是未來的道路？」咱欲按怎看待電子冊這款產品？電子冊生產又閣有啥物款難題？你敢有電子冊閱讀枋？或者是你敢會想欲愛一塊？這集邀請前衛出版社主編鄭清鴻，來共電子冊佮紙冊之間的愛恨情仇講透流。

zh_TW

高雄咧衝啥？台灣上衝的港都，好食好耍無崁步 ft.夕陽武士

社群咧衝啥 ·

2025/07/24

這幾年高雄變做台灣演唱會的中心，世界各國的歌手、樂團攏來到高雄開唱，也連帶共高雄的觀光旅宿規个𤆬起來，高雄景點、美食佇社群平台嘛時常成做關鍵字，這集邀請高雄在地搖滾樂團「夕陽武士」來做導覽先生，替逐家𤆬路踅高雄，外行綴人買，內行看布底，想欲揣著在地人的「橐袋仔清單」，就毋通落勾這集，是講……亞特佮來賓怎會一開頭就先得失台南……？-- 2025 夕陽武士《下港少年回頭望》巡迴家鄉最終場資訊：時間：8/16（六）18:00 地點：高雄海邊的卡夫卡－高流店售票連結：https://kafka.kktix.cc/events/sunsetsamuraikafka

zh_TW

劇場咧衝啥？台魂西骨講有影台頂腔口漳泉拚 ft.施冬麟╱劇場演員

社群咧衝啥 ·

2025/07/17

來賓：施冬麟╱劇場演員佇網路社群時常會使看著人問起台語某某詞的發音，眾人留話的講法是定定無啥款，這時「腔口差」就會變成討論的話題，金枝演社2025年推出以「漳泉拚」做背景的台語舞台劇《整人王－新編邱罔舍》正正就是提「腔口差」來做話題的戲劇演出，看漳腔佮泉腔二个家族大捙拚，互相剾洗、看袂順眼，又閣看二爿的查埔囡仔佮查某囡仔相意愛，這層親事敢有可能講會定？聽講若欲會合和著靠邱罔舍？邱罔舍是何許人也？江湖傳說前世是鱸鰻精，這世佇人間捙龜弄甕干干仔人閣好額，想袂到伊的背後嘛有一段故事講無人聽，來來來，耳空著洗予清，人著坐予定，咱來聽搬演邱罔舍的演員施冬麟(小冬)，按怎講出邱罔舍的心聲。

zh_TW

阿媽咧衝啥？95歲做網衝，阿媽講古孫經營 ft.金棗阿媽、金孫

社群咧衝啥 ·

2025/07/10

來賓：金棗阿媽、金孫台灣上濟歲，嘛上古錐的網衝「金棗阿媽」來矣！！佇社群平台Instagram頂頭因為講古衝甲掠袂牢的「金棗阿媽」猶閣有幕後的經紀人、製作人兼查某孫的「金孫」，做伙來到「社群咧衝啥」分享阿媽是網衝的感想，70歲就感覺人已經無路用矣的金棗阿媽，佇95歲開創事業第二春，心境有啥款變化？金孫為欲經營阿媽的社群口座，拍拚學習台文，敢有啥物感想？這集咱來做伙了解，金棗阿媽的「網衝之路」。 -- 前往＞＞央廣臺灣台語迷眾頁聽友來函：atlantis919@rti.org.tw 【揣著亞特】亞特陪你káng台語　亞特陪你káng台語　✪ 亞特節目金棗阿媽來講古在 Instagram 查看這則貼文 Rti腦癢央（@rti.nownow）分享的貼文在 Instagram 查看這則貼文 Rti腦癢央（@rti.nownow）分享的貼文

zh_TW

41 results

社群咧衝啥

All Episodes

Similar Podcasts

Voices of Life

APG Mannheim

Promo Estereo Podcast

Promo Estereo

Talking Timelines Podcast

Talkingtimelines

גיקונומי

ראם שרמן ודורון ניר

Drømmefanger

Drømmefanger