PODCAST

社群咧衝啥

使用台語談論社群時事，第一個遇到的問題就是「這個詞台語怎麼說？」，許多人自認的「台語很好」其實僅侷限於低限度的簡易日常生活用語；然而當代社會資訊爆炸，每天都有新事物出現、即使是兒童的生活用語，也已過去大不相同，台語需要在這樣的快速變動中，迅速趕上，除了專家學者訂定的新詞辭庫，更需要在網路上、生活中、媒體內容裡都被不斷被使用，才有機會補足「台語沒人這樣說」的刻板印象。《社群咧衝啥》給你網路爆紅話題、有趣的人事物或社群流行趨勢解析，「社群咧衝啥，台語綴時行！」 -- 前往＞＞央廣臺灣台語迷眾頁聽友來函：atlantis919@rti.org.tw 【揣著亞特】亞特陪你káng台語亞特陪你káng台語✪ 亞特節目

society & culture relationships

All Episodes

詩集咧衝啥？(二)詩、散文、小說，台文出版按怎揣路通出脫？

社群咧衝啥 ·

2026/04/08

透過台文詩集《日花閃爍》衝上天的現象，這集對作者温若喬的角度，來看台文出版的市草佮新路。台文出版佇作家方面，敢有啥物會用得接觸著新讀者的寫作理路？若喬對「小情小愛的共通感情」、「文字的斟酌」、「詞彙對感情的鋪排」到「接受『無遐爾台語氣』」幾个方面來討論，是講……是按怎討論到尾仔，亞特煞得出一个結論：「台語是台灣的京都話」？？

zh_TW

詩集咧衝啥？(一)《日花閃爍》衝上天，台文媠詩啥道理？

社群咧衝啥 ·

2026/04/01

你敢捌聽過《日花閃爍》這本台文詩集？自出版以來無論佇冊店、出版業界攏引起真濟討論，出版當日頭一刷就賣了了，全台冊店買無冊，短短二個月，竟然已經來到七刷，總印冊量超過25000本，這款驚人的成績，就算佇台灣的華文出版界嘛是現象級的大代誌，甚至這本詩集閣引起總統賴清德的注意，毋但佇台北國際書展收入總統冊單，聽講也是總統佇冊單內底頭一本讀的冊，甚至閣佇今(2026)年世界母語日邀請作者若喬到總統府讀《日花閃爍》內底的詩！這款使人設想袂到的台文出版異象，背後敢有啥款社會的原因？作者若喬又閣做著了啥代誌？這集邀請若喬閣來到節目當中，以作者的角度來看《日花閃爍》的誕生佮現象觀察。

zh_TW

交友APP咧衝啥？(二)假冒名人陷愛戀，一騙2千800萬

社群咧衝啥 ·

2026/03/25

這集由亞特單口來講古，講起假冒名人行戀愛路，有受害者佮車手攏是華仔的迷眾，嘛有韓國李敏鎬佮你Line的時字攏寫「簡中」，Brad Pitt講陷入離婚官司閣著癌真傷重，受害者投落2800萬(台票)錢煞齊失蹤。網路名人佮交友詐騙到底有幾種？這集咱來開拆金光黨的手段有偌雄，嘛透過數據來看這幾年，敢誠實有做網路詐騙的防治，效果啥款，受騙的金額敢有減幾圓？咱若愈對詐騙手法有知機，就愈會當保護身邊的親人、朋友佮家己。

zh_TW

交友APP咧衝啥？(一)網路愛情敢有影？來問交友APP社會觀察家

社群咧衝啥 ·

2026/03/18

亞特相片予人來偷提，佇網路冒充是欲創啥貨？聽講囥佇網路交友的軟體，毋知會產生啥問題？為欲了解交友APP咧舞啥，這集特別請出廣播界前輩阿旻(曾偉旻)來贊聲，原來伊是交友APP的社會觀察家，幾若間服務伊攏有橐錢無咧驚心疼，聽講有人叫伊「老公～」貼心肝，害伊眩船閣愣山(gông-suann)，毋過想欲招出來相對看，對方無閒無奈何(bô-ta-uâ)，閣講二人著仝心做伙行，這个教趁錢的課程你著去報名，身陷情關的阿旻欲按怎？線頂交友到底是該看破，抑是有心拍翸(phah-phún)就有小生小旦的愛情戲通搬？

zh_TW

台灣史咧衝啥？台灣史補課當時行，網路冊店佔榜單

社群咧衝啥 ·

2026/03/11

猶未上檔的電影《世紀血案》風波了後，眾人攏咧問「我怎會攏毋知遮的過去？」人人進入台灣史大補課階段，網路冊店甚至出現大銷排行前五名，有四本佮台灣史有關係(賰一本是台文詩集)，加上最近人稱「民主油罐車」的101董事長賈永婕佇網路喊聲，翻頭去了解台灣近代歷史變做一件時行代，佇這个湧勢當下，節目邀請以出版台灣相關歷史出名的前衛出版社總編輯鄭清鴻，來分享伊的觀察佮看法，嘛推薦適合的相關的冊予想欲「補課」的聽友，做伙熟似遐的「學校╱課本無教你的歷史」。

zh_TW

社群咧衝啥？台語氣口按怎練？就看Youtube懸頂 ê 台語仙 ft.光頭╱台語社群經營者

社群咧衝啥 ·

2026/03/04

「粗皮雄」、「卓糞埽」，你敢聽過遮的電視劇人名？講著學台語，有真濟人會推薦看台語連續劇，毋過現此時的台語連續劇華語透濫濟，演員嘛毋是隨人攏真輾轉，這時過去一寡仔真出名、台語氣口真好的台語連續劇，就變成當衝的選擇矣！台語社群口座「Youtube懸頂 ê 台語仙」專門共過去真精彩的台語劇片段，特別是講著目今較少人講的用詞、俗諺剪出來，佮觀眾做伙分享、做伙學習，甚至嘛引起真濟人對過去的連續劇的趣味，顛倒翻頭去Youtube頂頭揣遮的官方放出來的影片來看。這款社群口座經營的想法是按怎來的？又閣會拄著啥款問題？未來口座想欲按怎發展？這集邀請「Youtube懸頂 ê 台語仙」口座創辦者，來分享做這个口座的想法佮收穫。

zh_TW

百萬咧衝啥？講台語提百萬，組隊比賽拚奪冠 ft.徛鵝、阿狗╱台語比賽冠軍隊

社群咧衝啥 ·

2026/02/25

提走亞特的一百萬的敵手(?)來矣！電視節目《全家有智慧》第七季冠軍隊成員阿狗佮徛鵝來節目分享學台語、共台語抾轉來的過程，in 是底當時失落？又閣按怎抾轉來？猶有組隊對初賽一路過關斬將，最後提著總冠軍佮一百萬的心情佮鋩角，in 佇參加節目進前敢有做啥準備？聽講有利用製作單位的心態，掠著一寡仔鋩角？這款比賽閣著考慮賽制，毋但比程度，嘛著跋心機？這集就請阿狗佮徛鵝來講透機。※阿狗佮徛鵝嘛有一个公視台語台的網路節目《少年，這一工》通線頂看喔！

zh_TW

特權咧衝啥？身份家世學歷，敢是會當繼承的利益？(二) ft.唐墨╱作家

社群咧衝啥 ·

2026/02/18

Privilege來到第二集，特權到底是啥貨，這集咱對社會學者的講法來熟似Privilege的意義，猶有真濟趣味的比喻，有人是揹仔飽飽物件袂少，有人是啥攏無干焦一領破草蓆，平平欲去仝一个所在，有人是毋免操勞，橐袋仔底自然有車票，嘛有人是拚死拚活儉腸凹肚彼幫車才坐會著，階級的分別敢誠實會流動，或者敢穩當愛流動？除了經濟條件，privilege敢有其他類型？比論講「文化資本」、「社會資本」？3分的唐墨佮5分的亞特欲來討論18分的利益者，該當按怎討論？你聽落去就知。

zh_TW

特權咧衝啥？身份家世學歷，敢是會當繼承的利益？(一) ft.唐墨╱作家

社群咧衝啥 ·

2026/02/11

前一站仔「特權」話題當時行，你認為家己的成長過程當中，是有特權抑是無特權的人咧？講到底，特權到底是啥？怎樣才算有/無特權？網路頂有人開出一張20題的特權試驗清單，亞特揣來唐墨做伙來做試題，看覓得著的分數到底是偌濟，是亞特懸抑是唐墨低？或者阮二人攏是無特權無翼通飛？邀請聽友做伙來聽節目做試題，共阮講你得著幾分！

zh_TW

戲劇咧衝啥？𤆬囡仔做伙看戲，彼碗鰇魚糜的滋味 ft.易蓁╱夾腳拖劇團團長

社群咧衝啥 ·

2026/02/04

你敢捌食過鰇魚糜(魷魚粥)？你敢知，有一寡仔人逐年到了二二八，就會煮鰇魚糜來食？這碗鰇魚糜背後是一个家庭的故事，嘛是一个時代的故事。台北市律師公會會長李瑞漢佇1947年二二八事件發生了後，召集台北市律師公會開會，對台灣省行政長官陳儀提出改革意見，3月10號佮小弟、朋友佇厝內做伙食鰇魚糜，便衣佮憲兵入來，將眾人𤆬走，李瑞漢安搭夫人邱杞妹，講鰇魚糜聽候伊轉來才食，自此，就毋捌轉來矣…… 荖履仔劇團(夾腳拖劇團)推出結合尪仔、真人、光影佮故事冊、以李瑞漢的故事做基礎的囡仔戲，欲按怎予家長佮囡仔會當討論歷史，又閣袂傷過頭沉重？欲按怎予囡仔看戲毋免坐佇椅仔頂感覺捒縛？猶有，團長易蓁所講的，欲按怎予囡仔佮大人攏感覺著「愛」，才是這齣《鰇魚糜ê滋味》真正的芳頭。

zh_TW

電影咧衝啥？一齣《大濛》炤歷史，幼點濟濟敢看有？ ft.阿諺╱Podcaster

社群咧衝啥 ·

2026/01/28

2025年台灣電影討論上濟的應該就是《大濛》矣，以白色恐怖時期做背景，講一个查某囡仔對嘉義到台北為欲領阿兄予政府銃殺的身屍，一路的種種過程，除了古錐好笑，嘛有使人毋甘佮感動甲流目屎的站頭，毋過電影內底幼點濟濟，你敢有看透？這集邀請歷史類Podcaster《敘事圈》的阿諺來開講，做伙討論《大濛》內底的阮所看著的幼點，猶有關係白色恐怖背景的電影到底愛講到偌深才是適當，電影看煞、節目聽了，咱做伙來想看覓。

zh_TW

心理學咧衝啥？社會事件引創傷，自我安搭借力量 ft.阿寶╱諮商心理師

社群咧衝啥 ·

2026/01/21

無論是疫情、天災或者是舊(2025)年底的無差別殺人案這款咱無法度預防的事件發生，時常會造成規个社會的集體創傷，咱會變甲足無定著、真燥性、真齷齪(ak-tsak)，其實這攏有可能是這款心理創傷所引起的反應，咱為著欲安搭家己，會想欲得著閣較濟資訊予家己安心，毋過佇社群平台時行的這馬，你敢知，一直掰手機仔看社群資訊，有可能顛倒會引起二次傷害？！這集邀請諮商心理師阿寶來做伙討論關係集體創傷佇社群時代的應對方法。

zh_TW

社群咧衝啥？IG面頂衝袂離，這是「阿銘講台語」 ft.阿銘╱台語社群經營者

社群咧衝啥 ·

2026/01/14

過去台語定定予人誤解是濟歲人才有咧講，現此時毋但少年人有咧講台語，而且有愈來愈濟人毋過有心講台語、學台語，閣會透過現代人時行的方式共學台語的鋩角，或者是生活中的大大細細事物的台語詞，推捒到可能的收眾面頭前，這款做法的成果閣不止仔有效。佇社群平台Instagram面頂透過Reels(短影音)功能來講台語、湠台語的「阿銘講台語」就是其中之一。「阿銘講台語」才推出無偌久，21支Reels就吸引4萬外人追蹤，有的影片甚至有百外萬遍的收看，伊到底是按怎做的？敢有啥物鋩角通好想欲經營社群口座的人通好學起來的咧？毋過落勾這集節目！

zh_TW

嘉義咧衝啥？在地好食好𨑨迌，那耍那聽非洲鼓 ft.江鳥╱嬉班子樂團團長

社群咧衝啥 ·

2026/01/07

這幾年嘉義好食好耍愈來愈時行，文化發展是閣較奢颺，這回邀請在地人，同時是非洲鼓樂團嬉班子的團長江鳥，來介紹予逐家較無了解的「新港」食食，猶有逐家傳說中的「涼麵+白醋」、「橋仔蜜+豆油+薑」的神奇組合，江鳥甚至講出外埔頭綜合果汁竟然無咧摻○○，原來綜合果汁猶有這款精差？同時咱嘛𤆬聽友做伙來熟似嬉班子這个真特殊的在地鼓樂團，非洲鼓配台語聽起來是啥物感覺？這个團行過二十冬，又閣是按怎堅持落去？後回欲去嘉義𨑨迌，沿路會使那放嬉班子的歌來聽，穩當有無仝款的趣味。

zh_TW

死語咧衝啥？(三)四書五經讀透透，不識黿鼇龜鼊竈 ft.黃震南╱藏書家

社群咧衝啥 ·

2025/12/31

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑ 本集解題：✪清氣小姑碗崁屎✪海瑞兵，會食袂相舂✪牡丹的寫批，慘的加落寡✪催命鬼，看做註生娘娘✪袂輸魏延咧✪袂輸呂蒙正✪城隍爺的頭殼，你也敢挲✪孔子公毋敢收人隔暝帖✪蔡牽造炮炸家己✪阿媽袂認得阿祥✪文王拖車✪食碗內，說碗外✪俄羅兵，德國銃✪程咬金三日皇帝✪羅漢請觀音✪呂洞賓，顧喙無顧身

zh_TW

死語咧衝啥？(二)四書五經讀透透，不識黿鼇龜鼊竈

社群咧衝啥 ·

2025/12/24

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑本集解題：✪趙子龍欠馬✪食竹仔枝炒肉絲、食大封、食膨餅✪驚死芋莖✪毋通戇戇綴人去培墓✪使用人✪欶田螺✪內條筋✪共伊撈(hôo)起來滴水✪一支跤毛管七个鬼✪可憐的梅仔餅✪䆀䆀仔仕相俥✪佮孔子公諍字✪海口仙✪陳三磨鏡✪菜礤姆仔

zh_TW

死語咧衝啥？(一)四書五經讀透透，不識黿鼇龜鼊竈

社群咧衝啥 ·

2025/12/17

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑本集解題：✪摃狗毋出門✪六跤長鬚 ✪你曷毋是林本源✪這馬是咧陳三磨鏡，抑是英台哭兄？✪硩貓岫 ✪peh-jiáu-ue ✪咱人 ✪頭毛有臭雞酒味 ✪飽水 ✪七里香，盤出牆 ✪束樹奶--ê ✪斷半仙 ✪坐(tshē)毋著

zh_TW

廟公咧衝啥？(二)雲遊環島帶任務，欲解因果大小事 ft.楊庭俊╱少年廟公

社群咧衝啥 ·

2025/12/10

少年廟公繼續環台濟世！頂一集咱講起少年廟公按怎看待修行，猶閣有按怎做一个「自由廟公」了後，這集咱正港欲來環島修行濟世途矣，聽廟公講，伊的環島時常是神明旨意欲解因果，毋過這幾逝環島修行路，伊解了啥物因果？又閣拄著啥款怪事？有時廟公替神明做領隊，有時好親像就會當摸飛(moo-hui)？這集亞特專工請少年廟公推薦平常時真值得去行行兼拜拜的廟宇，趕緊來聽伊會介紹啥物廟！

zh_TW

廟公咧衝啥？神明旨意修行路，少年廟公濟世途(一) ft.楊庭俊╱少年廟公

社群咧衝啥 ·

2025/12/03

少年廟公來央廣濟世矣～！佮過去刻板印象認為廟公攏是有歲人無仝，少年廟公楊庭俊猶真少年就咧廟內服務，離開了後竟然閣變成「自由廟公」？！這个「自由」是按怎來的？無固定服務的廟敢會用得講是「廟公」？行上環島濟世步步修行之路的廟公，沿途會搪著啥物代誌？出冊了後讀者有回饋，想袂到神明嘛會有交代？是講廟宇界的「愛哭團」佮神明界的「支持團體」到底是怎樣一回事……？

zh_TW

認證咧衝啥？烏鴉啉水投石落瓶，台語來講伊索寓言 ft.魏俊陽╱台語教師

社群咧衝啥 ·

2025/11/27

節目播出的隔工11/29就是成大「全民台語認證」的考試日囉！毋知聽友敢有人去赴考咧？亞特先祝福有去考試的聽友，逐家攏提著心目中的好成績。是講無論是教育部的抑是成大的台語認證考試，對你來講上困難的是佗一款題型咧？聽講有真濟人佇「口說」方面有較食虧，因為口說考試的型式是看圖講故事，對猶無遐爾慣勢以台語思考的朋友來講，欲雄雄就講出故事無重耽，確實是無簡單。今仔日這集介紹一本會使當做考試工具冊，嘛會使當然日常訓練、以「伊索寓言」做主題的冊，其實若是以亞特來看，這本冊嘛會使當做是練習台語家庭的家長講故事予囡仔聽的基礎訓練冊喔！是講，亞特佇節目內底有分享一个應對台語口說考試的鋩角，只是……敢若無蓋實用……？

zh_TW

41 results

社群咧衝啥

All Episodes

Similar Podcasts

Voices of Life

APG Mannheim

Promo Estereo Podcast

Promo Estereo

Talking Timelines Podcast

Talkingtimelines

גיקונומי

ראם שרמן ודורון ניר

Drømmefanger

Drømmefanger