PODCAST

粵講粵威水

本來，這個節目在設立之時，是因為看到了一些社會事件，有感而發。譬如：2010年，中國廣東省廣州市的捍衛粵語行動。 2018年，香港教育局小學中文網頁內的一篇文章，提到粵語並非「母語」。再加上近年，港澳愈來愈多學校在校內僅以普通話及英文授課。看著港澳的年輕一輩，居然普通話說得比粵語還流利，是有很大的感觸，也有很多的思考。危機越大，求生的意志就越強。總之，「撐粵語」的這股潮流在有心人士的深入探討後，的確「粵人」講「粵語」是愈講愈有理的。而有心的話，在網路上就可以找到很多很專門的粵語研學的心得。資料是有的，不過可惜，關注還不夠多，普及也不夠。以前總愛跟大隊嗌口號「講母語」，「撐粵語」。現在更想藉這個節目，這個公開的平台，尋找這個為什麼？為什麼粵語有趣？為什麼粵語歌比較好聽？為什麼說這些就是粵樂？？？對粵文化，到底我們有多少的認識呢？或者根本除了粵語識聽識講，日常生活中見慣見熟、習以為常之外，當中的道理跟涵意，根本是完全說不出來吧！

society & culture

All Episodes

推廣粵語--從自己做起帶動其他人

粵講粵威水 ·

2022/07/20

推廣有經濟性嘅，有利益嘅，梗係容易。而粵語，冇咩利益，甚至自己可能要先攞錢出嚟。如果係職業性需要，比較可以長久同堅持咁做落去。如果係興趣，自發性，真係會覺得好攰、好無力。不過，好多嘢就係咁，有興趣、想做、應該做嘅就要有盼望、有堅持。從自己做起，做得幾多係幾多，一點一滴，就會有成果的

zh_TW

用共產中文就會畀人洗腦？！語言代表咗我哋嘅思想唔想改變思想嘅話...

粵講粵威水 ·

2022/07/13

被認為係匪語嘅字詞，其實包括咗好多種類，譬如有低收入人士、把關、協商、到位、表態、非物質、活化......等等，呢啲喺書面語當中，都係經常會用嘅詞語，呢啲字詞係1949年之前定係之後先出現，咁就真係要一個個討論。除此之外，仲有譬如呢類--真係比較有共產色彩嘅詞語，譬如：上綱上線、扣帽子、政策傾斜、思想工作、持份者、個體、滅貧、貧下中農、黑材料、精神文明工程......，呢啲係共產黨喺運動中經常使用嘅語言或者標語，完全係共產黨創造出嚟嘅，呢一類就係共產中文。共產中文喺生活中適唔適合用？就要睇目的係咩啦！香港中文大學中國語言及文學系博士黎智豐博士認為:語言代表咗我哋嘅思想，唔想改變思想嘅話，的確應該避開一啲用詞。另外，以溝通嚟講，共產中文有強烈嘅地區色彩，有啲用語，有啲地方可以接受，有啲地方未必接受，為咗溝通順暢，應該用比較有共識嘅文字。重有喎！就以香港嚟講，從政治、經濟、社會、文化、教育......都已經受到中國好多好多嘅影響。如果以保留多元性角度來睇，保留多一啲粵語本身既有嘅字詞，對於成個語言嘅發展亦都係好嘅。

zh_TW

唔講匪語？！係唔係匪語先？好多所謂匪語都係台灣常用詞喎

粵講粵威水 ·

2022/07/06

匪語，有冇聽過？根據網路嘅解釋：「匪語，就係共產中文，依附極權而生，屬政治宣傳工具，意識暴力，也是洗腦語言，人人變了鸚鵡學舌的機器。」另外，亦都有咁樣嘅解釋：「在香港，匪語泛指來自近代中國的華語用詞，帶有貶義的意思。」匪語，有呢種語咩？香港中文大學中國語言及文學系博士黎智豐講：匪語，係意識形態非常強嘅一個用語，係對其他語言嘅一種貶抑。某個程度上，係將華語或者係中文當中，喺1949年以後，或者係共產統治之後嘅中文，畀咗一個新嘅標籤。咁邊啲詞語係匪語？有網友整理咗好多匪語例子Po 喺網路上，奉勸粵語人唔好講、唔應該講。舉啲台灣人可能比較熟悉嘅用詞，譬如：拍板、民眾、單位、人性化、打造、把關、事故、亮點、景點、用到刀口上......，哇！頭先舉例嘅呢啲，以台灣習慣用語嚟講，幾乎中晒！所以，啫點呀！啫係：匪語，喺語法上或者喺文字使用上，都係中文嘅範疇。而且匪語亦都包含咗好多種類嘅詞語，有北京話、普通話、或者其他地方出現嘅用語，都有被歸類為匪語。黎智豐博士講：「所以可以講，咁樣匪語嘅歸類，其實就係政治上，對立、對抗嘅一種標示。」你話係唔係呢？

zh_TW

粵語口語好多「都」？！

粵講粵威水 ·

2022/06/29

喺粵語口語中，經常用到「都」呢個字，「你唔去，我都唔去。」「點都好啦！」「我都好開心。」「講極都唔聽」講嘅時候唔多覺，純口語寫落嚟之後一睇，如果唔刻意改吓嘅話，「都」實在好經常出現。點解粵語咁經常用到呢個「都」字呢？粵語老師William先拆解吓「都」字嘅用法，首先一個用法係--表示前面所指嘅複數事物全部包括在內，呢個同中文「都」嘅用法類似，譬如「我哋都好開心。」。另一個用法，就係表示兩個或者兩個以上嘅嘢都係屬於同一類，或者有相同嘅狀況，有強調嘅功能，呢個同書面語「也」嘅用法類似。譬如之前舉過嘅例子：「你唔去，我都唔去。」簡單嚟講，粵語口語嘅「都」，語義範圍比較大，佢有中文「都」同「也」嘅意思。而「也」對應返粵語口語，又有「又」、「亦」、「都」三個類似意思嘅字，咁啫點，啫「都」字，其實唔簡單囉！

zh_TW

「蕃薯屎未屙清」講邊度嘅口音有臉子啲？！

粵講粵威水 ·

2022/06/22

「蕃薯屎未屙清」，呢句俗語有冇聽過呢？以前生活比較艱苦嘅年代，有錢人先有飯食，冇錢就要食蕃薯。鄉下條件比較冇咁好，冇飯食就食蕃薯，咁屙出嚟嘅大便就係蕃薯屎。呢句俗語就係省城嘅人，譏諷鄉下人，話人哋咩都唔識咁嘅意思。呢句俗語梗係好冇禮貌，而家啲人唔講嘅啦！可能都唔識添！不過，呢個情況仲有冇呢？以前，就講港澳地區，粵語講得唔正，會畀人笑嘅，會畀人話係「阿燦」，鄉下嚟嘅。喺省城、喺大城市大嘅，好似係威啲、有臉啲嘅。而家仲會唔會咁呢！分幾方面講，而家粵語講得唔正，已經唔會畀人笑，好多外地人去到港澳，甚至覺得都唔使學粵語添！咁呢啲大城市大嘅人，會唔會再笑鄉下嚟嘅呢！大家撫心自問，自己就知啦！「蕃薯屎未屙清」延伸到而家，比較得意嘅反而係--有冇人，就係會以講得一口邊度嘅口音自傲自居！或者係--非我族類者，總之同自己唔同口音，就覺得人哋「唔啱」「唔正」呢？？

zh_TW

簡體字！殘體字？實際使用上的確唔夠用

粵講粵威水 ·

2022/06/15

將簡體字叫做殘體字，咁樣嘅稱呼，你有冇聽過呀？殘，就係殘缺嘅意思。殘體字，從字面解釋，覺得有貶義，亦都係一種情感嘅表達，或者係意識形態上，反對使用簡體字嘅一種稱呼。殘體字嘅叫法，如果係中文嘅老師會唔會當錯？香港中文大學中國語言及文學系嘅黎智豐博士就話，呢個要睇咩狀況下使用。如果係比較客觀嚴格嘅討論，就唔應該有價值嘅判斷。如果係寫自己個人嘅感受，主觀嘅寫法都可以接受，所以要睇係客觀嘅討論定係主觀感受嘅表達。簡體字喺學術上、使用上係唔係真係唔夠用、唔好用呢？首先，1955年開始，大陸開始推行呢個「漢字簡化方案」，其實係為咗減少文盲。簡體字大概只有2千多個字，喺中文當中、或者喺文言文當中，有啲比較複雜嘅字，其實係冇簡體字。另外，就算係大陸嘅學者，如果要讀古書，讀一啲冇簡體字時代嘅著作，或者要引用原文，對繁體字都係要非常熟悉。仲有，大家諗吓，喺文言文當中，就算一個繁體字可能都有幾個意思。轉為簡體字嘅字，一個簡體字可能就代表咗幾個繁體字，可能性就更多，對閱讀上真係唔係好方便。不過，大家都要知，所謂繁體再往前推，係甲骨文、金文

zh_TW

粵語人點樣提升學母語嘅興趣？

粵講粵威水 ·

2022/06/08

有冇覺得，就係母語，覺得要學要更精進嘅人反而越少？或者講，都已經係母語啦！已經識聽識講，點解仲要學呀？到底要學咩呀？咁就要睇你點樣看待你自己嘅母語！亦都要睇你有冇咁樣嘅自覺--譬如自覺可以學多啲，識深啲。好多人，學外語好上心，尤其經濟語言、工作語言、可以搵錢嘅語言，梗係積極。咁對母語呀！夠用就得，都冇錯㗎！所以增加興趣真係好重要，增加對自己母語嘅興趣，自己會想學多啲。點樣令人增加對母語嘅興趣？粵語老師William以自己嘅教學經驗為例，佢認為最有用嘅學習動力，一係利益、二係興趣。學好母語最大嘅好處，學多樣嘢點都係好嘅，點知以後咩情況。至於興趣，用粵語創作嘅作品越多、越好、越得意，吸引力就越大。另外，想小朋友學好母語，從細，真係從出世開始到返學，大概呢兩、三年嘅時間，真係最好嘅黃金時間。尤其喺非母語地區，更要把握呢幾年，堅持呢兩、三年同佢講母語，小朋友就算入學之後，唔再講母語，佢都已經識聽。否則小朋友一大，一有辨別能力先話同佢講母語，想教佢，小朋友根本唔聽，亦都唔畀你講嘅啦！

zh_TW

粵語多倒裝？到底係唔係倒裝先？

粵講粵威水 ·

2022/06/01

咩係倒裝？如果從中文嘅角度嚟理解嘅話，香港中文大學中國語言及文學系博士黎智豐講：一般中文嘅核心結構，就係主語、謂語、賓語。例如：我食飯，我係主語，食係謂語、飯係賓語。如果用咗其他語序，例如:飯擺前面，或者我擺最後，唔係用呢種主謂賓嘅結構，某程度就可以叫倒裝。咁樣嘅倒裝結構，喺清朝甚至更早，就已經有咁樣嘅倒裝結構。喺口語上，粵語好多倒裝?首先，口語同書面語，喺好多時候表達上係唔同嘅。口語會比較隨意啲，有陣時口語會將重要嘅擺前面。例如:叉燒飯我想食。從中文角度，呢個就唔完全係倒裝，係主題前置，將討論當中，最重要嘅重點擺前面，令到討論更順暢，呢個係其中一種類別。當然亦都有其他嘅類別，例如：走先啦我！呢個係語末助詞，係粵語當中好常見嘅特色。如果抽走個語氣詞，抽走「啦

zh_TW

港澳粵語越講越平？

粵講粵威水 ·

2022/05/25

同以前比，港澳嘅粵語係唔係越講越平？平嘅意思，就係抑揚頓挫越嚟越少？聽吓3、40年前嘅新聞播報，聽吓當時嘅錄影錄音！覺唔覺呢？點解會咁樣？其實都好得意。如果有人講嘢，有好重嘅抑揚頓挫，可能就會畀人問：「你廣州㗎？大陸㗎？」好似，好重嘅抑揚頓挫嘅呢種特徵，就係同廣州、或者係同廣東省連埋喺一齊，會覺得好唔香港。另外，粵語嘅高降調，主要喺廣州附近出現。可能以前，高降調同陰平調嘅分別，係有辨異嘅功能。但係到後來，大家可能覺得呢個辨異嘅功能唔再重要，又或者已經可以透過其他嘅方式去辨異，所以就少用高降調啦。又或者係，慢慢喺講嘢嘅過程將佢合併喺一齊。當然，仲有好大嘅一個可能，就係--講好重嘅抑揚頓挫可能比較攰，比較冇咁好講，就好似好多懶音嘅出現一樣。再過3、40年，或者嗰陣嘅粵語，同而家又唔一樣囉！

zh_TW

嚟自英文嘅呢啲粵語

粵講粵威水 ·

2022/05/18

中英夾雜，係香港人講嘢嘅一大特色。咁就算唔夾真嘅英文字，其實，喺粵語當中，本嚟就有唔少英式中文嘅粵語。而呢啲粵語同正式英文之間嘅文法同發音都有唔同，偏偏喺以粵語為母語嘅地區，又好普遍都有咁樣嘅講法。好多嘅呢啲粵語，甚至講到好多人可能都唔記得咗係嚟自英文啦！呢集節目，嚟聽吓粵語老師William嘅舉例。譬如：唱錢--貨幣兌換，就係嚟自change。仆街--指粗劣嘅人、跌倒，或者就係粗口，鬧人。有人講就係嚟自英文poor guy, 有人亦都有唔同講法。茄呢啡 --臨時演員，跑龍套，就係嚟自英文carefree。免治牛肉嘅免治--係嚟自英文嘅Mince，就係將肉切碎、剁碎或者絞碎，做成免治肉嘅意思。老粒--搶劫，嚟自英文 Rob。花臣--花樣、招數，嚟自英文 Fashion。泊車--停車，嚟自英文 Parking 嘅 Park。好索--明艷動人，嚟自英文 Sharp。爆格--入屋盜竊，嚟自英文 Burglary。仲有好多好多嘅例子，大家可以一齊數吓諗吓。

zh_TW

粵語一字多音點知咩時候讀咩音？

粵講粵威水 ·

2022/05/11

喺粵語裡面，一字多音係好經常會有嘅情況。咁多音，到底讀邊個音好？呢個時候，最好嘅依據，就係睇詞例，詞例嗰度，會列舉出咩詞語，要讀咩音，呢個係好好嘅依據。不過問題係，粵語嘅發展非常百花齊放，各派學者各有認為。有陣時，同一個字，唔同學者都有唔同嘅建議讀音，呢個時候又點揀好？學者都有咁嘅唔同見解，啫差異係有嘅，既然學者都冇辦法即刻得出結論，咁就睇人睇習慣，聽吓身邊大部分嘅人點講，有樣學樣，都係一個依據。如果好想知道，點解學者會有咁樣嘅建議讀音？點解會有咁樣嘅唔同，咁就要講到背後聲韻嘅依據，呢個算係高級粵語嘅程度，要慢慢考究。

zh_TW

粵語、廣東話、廣州話、廣府話、白話、香港話你又習慣點叫呢？

粵講粵威水 ·

2022/05/04

粵語，俗稱廣東話，咁叫大概大家都明，所指就係喺香港地區聽慣聽熟嘅呢種語言。雖然而家普遍咁樣叫，不過都有人講，叫粵語同廣東話都唔算好啱，應該叫「廣州話」，因為呢種話係以廣州音為代表音。而且喺廣東地區，除咗呢種廣州話，仲有客家話、潮汕話、順德話、新會話...，甚至隔條村都有唔同嘅口音，將廣州話叫成為廣東或者粵地區嘅代表語言，合唔合理呢？亦都有人叫佢做「廣府話」，因為呢種話係以前廣州府通用嘅話。按清朝嘅行政劃分，廣州府管轄14個縣，包括南海、番禺、順德、東莞、香山（就係而家中山）、清遠、三水、從化、龍門、花縣、增城、新寧、新會、新安總共呢14個縣。而佢哋所講嘅廣府話，雖然可能口音有啲唔同，不過都係通嘅。至於白話，廣西地區將粵語叫白話。都有人叫佢做香港話，因為喺香港講嘅話，香港影視娛樂文化，傳到世界各地，好多人聽嘅學嘅都係香港口音，所以應該叫香港話。咁多種叫法，你又鍾意點叫呢？

zh_TW

粵語人識聽識講唔識教？！要教人先知道自己對母語認識嘅不足

粵講粵威水 ·

2022/04/27

喺台灣生活，梗係要學台語。雖然好多人都話，粵語同台語有好多相類似嘅地方，好多講法好似。但係呢啲嘅相似，都係喺稍稍識咗台語之後先會有嘅體會。一開始，尤其如果從來冇接觸過台語嘅粵語人，一聽台語，根本係完全聽唔明。近幾年，移居嚟台灣嘅香港人好多，為咗識朋友兼融入在地生活，各地都有一啲熱心人士自發舉辦形形式式嘅語言交換計劃。譬如由「宜蘭縣太平山下台港交流協會」所辦嘅「台粵語言交換計劃」。講起嚟都好得意，對我哋自己係粵語母語者嚟講，識講識聽，暢通無阻。但係一話要教人，真係有啲老鼠拉龜，冇訂埋手--點樣拼個音出嚟？點樣寫嗰個字？呢啲嘅粵拼粵字，要用嘅時候先知，原來對粵語，自己好多都唔識。而同樣情況，亦都一樣發生喺台語人身上，佢哋識聽識講，不過就唔係個個都識寫識拼嘅。甚至台語日常用語已經好好嘅人，叫佢哋用台語讀文章，都未必讀得出。粵語人用粵語讀文章，最多都係窒吓窒吓，讀唔順，但係未至於唔識讀。語言交換，甚至教人學自己嘅母語，都係一個從新認識自己母語嘅過程。可能越教，越會覺得自己嘅不足，越要學多啲嘅。

zh_TW

台粵語言交換計劃識朋友學母語融入在地生活

粵講粵威水 ·

2022/04/20

一班從香港移居到台灣宜蘭嘅香港人，喺2020年，成立咗一個「宜蘭縣太平山下台港交流協會」，志在促進台港嘅文化交流，協助在台港人儘快融入台灣社會。宜蘭係一個好山好水又好在地嘅一個地方，生活中講台語嘅機會比較多，想儘快融入，當然識台語就好重要。所以，「宜蘭縣太平山下台港交流協會」就辦咗呢個「台粵語言交換計劃」，一方面可以識朋友，另一方面又可以互學對方嘅母語。協會嘅理事康駿銘，阿康就講：「呢個語言交換計劃，而家參加嘅香港人比台灣多。都可以理解，因為生活中會用到台語，所以香港人學台語比較有動力同需要。而台灣又冇粵語嘅生活環境，學咗平時又冇人可以對話，意願就冇咁高！」其實，而家喺台灣各地，類似咁樣嘅「台粵」或者係「國粵」嘅語言交換越嚟越多，粵語喺台灣冇實用性？唔知呢！或者情況正慢慢改變中呢！？

zh_TW

香港人多懶音錯音？！何文匯嘅「正音」運動越「正」越...

粵講粵威水 ·

2022/04/13

「香港人嘅粵語好多懶音！？錯音！？」呢句說話，大家認唔認同都好啦！總之就係因為呢個原因，喺上個世紀80年代，香港中文大學何文匯教授就喺傳媒、喺課程上面，積極推行咗呢個「正音運動」，要幫香港人「正音」。何文匯嘅音，當然有啱嘅；不過當中有啲音，真係令人好疑惑。譬如：時間「時諫gaan3」話要讀「時奸gaan1」。機構「機扣kau3」話要讀「機救gau3」......。經過40幾年，而家何文匯已經退休，以前講話時間「時諫gaan3」係錯，「時奸gaan1」先啱都唔再講，不過呢個「正音」運動嘅影響仲係好大。「廣府話保育協會」會長潘國森老師就話：「當年，何文匯先生話時奸先啱，佢都做唔到次次都講時奸，有時候佢自己都講時諫。而佢講嘅機救，救買，有啲人自己延伸，折扣都讀做折救。星宿，讀星秀，有啲人自己延伸，民宿就讀民秀，搞亂晒香港人啲音。」

zh_TW

喺非母語地區點樣令下一代傳承自己嘅母語

粵講粵威水 ·

2022/04/06

離鄉別井，當身邊再冇人同自己講母語嘅時候，呢個時候，就更感受到母語嘅珍貴、母語嘅重要啦！無論去到邊，已經成年嘅第一代移民點都係「鄉音無改」，到第二代、第三代之後呢？母語係自己嘅根，點樣令自己嘅子孫繼續維持咁樣嘅連繫？好多移民到非母語地區之後，為呢個都非常煩惱！迫小朋友去學、去上堂，越迫越唔鍾意。其實，學咩都係要從興趣開始，父母如果真係重視自己嘅母語，自己就要去睇、去用、去鍾意。將自己嘅鍾意融入喺生活當中，先至係最好嘅教育，最好嘅傳承。甚至，將眼光放遠啲，唔好淨係諗住教自己嘅小朋友，教更多嘅人，令更多人鍾意、認識自己嘅母語。當父母家人認真投入之後，小朋友自有感受！

zh_TW

粵語的今天與明天

粵講粵威水 ·

2022/03/30

粵語是不是一種有活力的，有生命力的語言？或許可以從幾個方面來判斷，有沒有用這個語言來創作？跟什麼人可以使用這種語言？幸好，以粵語來看，現在還有很多的粵語流行歌曲、戲劇、小說、以及藝文創作，能說粵語的人也還有很多。以前到現在，粵語應該可以說是有活力的。但是再過一代以後呢？港澳地區很多學校標榜的是以普通話跟英語為主要授課語言。當小朋友，尤其比較小的小朋友，思考任何問題，想任何事情的時候，不能完全用粵語。有情緒的時候粵語就說不順了，這個時候，就應該思考，粵語是否還有活力了！

zh_TW

識聽識講好犀利！？但未必就有高級粵語嘅程度

粵講粵威水 ·

2022/03/23

以而家市面嘅一般粵語教學嚟講，派系好多，教材亦都好多，有老師著重喺實用會話，有老師認為都係要從基本功練起，從粵語拼音、聲調，一樣樣嚟學! 而粵語老師William，佢就係先教粵語拼音嘅呢一派，對粵語教學嘅初級、中級、高級嘅唔同程度，佢係咁樣分嘅。首先，初級粵語，講初級並唔係最簡單，初級粵語一般係教粵語拼音、聲調，基礎常用嘅詞語。學拼音聲調呢啲，可以講係打好基礎嘅必須，不過偏偏有啲無聊，亦都冇咩成就感，成日伊伊呀呀! 對粵語學習嚟講，係難捱嘅一步。不過捱落去，學識咗之後，對後面學發音會話都好有幫助。咁中級粵語，就係實用會話，亦都係書局裡面最容易搵到嘅粵語教材，形形式式。以主題式會話嚟教粵語，呢部分，無論係準備教材，定係講真係去教，都係唔難而又得意嘅部分。再落嚟所謂高級粵語，就係要搞清楚喺粵語平時嘅會話對話當中，到底有啲咩規律？有咩特色？普遍嘅用法？呢個係屬於研究嘅部分。如果以呢個標準嘅話，你覺得自己有冇高級粵語嘅程度呢？其實，好多粵語母語者，識講識聽，暢所欲言，都唔一定有高級粵語嘅程度，甚至可以講好多都冇高級粵語嘅程度，唔信呀! 得閒去睇吓嗰啲研究粵語嘅書就知啦

zh_TW

教粵語搵唔搵到食？

粵講粵威水 ·

2022/03/16

以華粵學院創辦人蘇貴珠老師嘅經驗，佢認為：「要求唔係太高，生活簡單，教粵語係搵到食嘅。」而家出面有好多中介，透過中介真係可以搵到學生。不過有啲中介食水深啲，長年都要畀一半人工佢。有啲好啲，第一堂課要免費試教，後面可能有一年半載，可以攞到一半到三分之二嘅人工。亦都有免費嘅中介平台，好似華粵學院嘅網址上面，https://icacnpo.com，都有咁樣的平台，學生可以喺嗰度搵老師。免費最好啦！否則一開始就畀人攞走一半人工，又真係好難開始。咁如果慢慢累積學生，再加上教耐咗加價，教粵語係可以搵到食嘅。不過，重點都係要靠網路、上網課，而且眼光亦都要放遠啲，唔好淨係教小朋友、或者淨係教自己嗰度嘅城市。而家喺網路上、書局都有好多教材，有人就係搵人用粵語傾偈、亦都有培訓粵語老師嘅課程，冇教學經驗都可以慢慢累積。蘇貴珠老師講：「所以都係要做大個餅，越多人鍾意粵語，先會需要更多嘅粵語老師。」

zh_TW

富翁捐百萬美金救史丹福大學粵語課有心就有可以出力嘅方式

粵講粵威水 ·

2022/03/09

物離鄉貴，語言離鄉之後呢？係更稀罕、更知道母語嘅重要。之前有一個好振奮粵語嘅消息，就係有位嚟自香港嘅富翁，捐咗100萬美金畀美國嘅史丹福大學，希望史丹福大學永遠保留粵語課程，他嘅義舉真係感動咗，亦都振奮咗好多對粵語嘅有心人。近十幾年，中國大陸接二連三推啲「推普廢粵」嘅政策，而香港喺「普教中」之下，生活中講普通話嘅人同情況都越嚟越多，令好多人好擔心粵語以後嘅未來！喺美國成立華粵學院，積極推廣粵語以及正體中文嘅蘇貴珠老師就講：「從成個勢可以睇到，再咁樣落去，唔只係強化一種語言，或者係多一種語言咁簡單。所以我先決定離開香港，喺自由嘅地方，聯繫結合各地方嘅力量，希望可以為粵語做更多嘅事。」喺世界各地，鐘意粵語嘅人有好多。譬如蘇貴珠老師透過網課就教過唔少外國人學粵語，佢哋學粵語，唔係為咗做嘢賺錢，冇呢啲功利目的，就係為咗鐘意。蘇貴珠老師講：「推廣傳承粵語，唔係一定要廣州、香港呢啲粵語地區嚟做，而且佢哋可能唔方便做、唔敢去做、或者冇辦法去做，所以就更要靠海外勢力。」好彩，重視粵語鐘意粵語嘅有心人，世界各地都有。美國有19間大學有粵語課程，其中包括哈佛大學。粵語人移民到非華人地區，自己製作教材、搵

zh_TW

381 results

粵講粵威水

All Episodes

Similar Podcasts

Voices of Life

APG Mannheim

Promo Estereo Podcast

Promo Estereo

Talking Timelines Podcast

Talkingtimelines

גיקונומי

ראם שרמן ודורון ניר

Drømmefanger

Drømmefanger